Exo 38 | NdeIBE | STEP | Bakha i-alithare lomnikelo wokutshiswa ngezigodo zesihlahla som-akhakhiya laba zingalo ezintathu ukudepha, ubude balo kuzingalo ezinhlanu, ububanzi labo kuzingalo ezinhlanu, lilingana inxa zonke.

Exodus 38

I-Alithare lomnikelo wokutshiswa

1 Bakha i-alithare lomnikelo wokutshiswa ngezigodo zesihlahla som-akhakhiya laba zingalo ezintathu ukudepha, ubude balo kuzingalo ezinhlanu, ububanzi labo kuzingalo ezinhlanu, lilingana inxa zonke. 2 Benza uphondo kumagumbi womane e-alithare, kwathi izimpondo le-alithare kwaba yinto yinye, basebelihuqa ngethusi. 3 Benza zonke izinto ezisetshenziswa kulo ngethusi – imbiza zalo, amafotsholo, imiganu yokuchela, ifologwe zenyama kanye lezindengezi zokubasela umlilo.

4 Benza iminxibo ye-alithare, bayenza ngethusi yaba ngaphansi kwesengamo se-alithare okuyingxenye yokuya phezulu. 5 Benza amasongo ethusi okubambisa imijabo yemagumbini womane yeminxibo yethusi.

6 Imijabo bayenza ngezigodo zesihlahla somakhakhiya bazihuqa ngethusi. 7 Basebehloma imijabo leyo emasongweni yaba semaceleni kwe-alithare ukuze lithwalwe ngayo. Balenza ngamapulanka laba ngumhome.

Umkolo wokugezela

8 Benza umkolo ngethusi njalo lokuwumisa kwenziwa ngezibuko zethusi ezazingezabesifazana ababesebenza esangweni leThente lokuHlanganela.

Iguma leThabanikeli

9 Ngemuva kwalokho balungisa iguma lethabanikeli. Ubude becele langeningizimu babuzingalo ezilikhulu njalo lilamakhetheni elembu elelukwe kuhle, 10 lilezinsika ezingamatshumi amabili lezisekelo zethusi ezingamatshumi amabili, njalo lilezingwengwe zesiliva kanye lamabhanti ensikeni. 11 Icele lenyakatho lalo lalizingalo ezilikhulu ubude njalo lilezinsika ezingamatshumi amabili, lezisekelo zethusi ezingamatshumi amabili, kanye lezingwegwe zesiliva lamabhanti ezinsikeni.

12 Icele lentshonalanga yeguma lalizingalo ezingamatshumi amahlanu ububanzi njalo lilamakhetheni, lilezinsika ezilitshumi lezisekelo ezilitshumi lilezingwegwe zesiliva kanye lamabhanti ezinsikeni. 13 Eceleni lempumalanga lakhona iguma lalibanzi okwezingalo ezingamatshumi amahlanu.

14 Amakhetheni azingalo ezilitshumi lanhlanu ubude ayenganxanye kwesango, alezinsika ezintathu kanye lezisekelo ezintathu,

15 ngakwelinye icele lakho kwakulamakhetheni azingalo ezilitshumi lanhlanu ubude, kulezinsika ezintathu kanye lezisekelo ezintathu. 16 Wonke amakhetheni ayehonqolozele iguma lethabanikeli ayenziwe ngelembu eliphothwe kuhle. 17 Izisekelo zezinsika zazingezethusi. Izingwegwe kanye lamabhanti lezinsika kuyisiliva, njalo izihloko zazo zihuqwe ngesiliva, ngokunjalo zonke izinsika zeguma zazilamabhanti esiliva, njalo izihloko zazo zihuqwe ngesiliva, ngokunjalo zonke izinsika zeguma zazilamabhanti esiliva.

18 Ikhetheni lesango leguma lalenziwe ngelembu eliphothwe kuhle lentambo eziluhlaza, eziyibubende kanye lezibomvu – kungumsebenzi wombalazi ngokuthunga. Ikhetheni leli lalizingalo ezingamatshumi amabili ubude, kanti njengekhetheni leguma ukudepha kwalo kuzingalo ezinhlanu,

19 lilezinsika ezine lezisekelo zethusi ezine. Izingwegwe zalo kanye lamabhanti kuyisiliva, njalo izihloko zalo zihuqwe ngesiliva.

20 Izikhonkwane zonke zethente lethabanikeli kanye lezizingelezele iguma zazenziwe ngethusi.

Okwasetshenziswa ekwakheni

21 Lokhu yikho ngobunengi bakho, okwasetshenziswa ukwakha ithabanikeli, iThabanikeli Lobufakazi, yikho okwalotshwa ngabaLevi ngokulawula kukaMosi ngaphansi kwesiqondiso sika-Ithama indodana ka-Aroni, umphristi.

22 (UBhezaleli indodana ka-Uri, indodana kaHuri, owesizwe sakoJuda, wenza konke uMosi ayekulaywe nguJehova, 23 wayelo-Oholiyabhi indodana ka-Ahisamakhi owesizwe sakoDani oyingcitshi yomsebenzi njalo engumdwebi, njalo engumbalazi ngokuthunga intambo eluhlaza, eyibubende lebomvu, kanye lelembu elicolekileyo.) 24 Isilinganiso segolide lonke lomnikelo wokuzunguzwa elasetshenziswa emsebenzini wonke wendawo engcwele lalisedlula kancane amakhilogramu ayinkulungwane ngesisindo kusiya ngamakhilogramu endawo engcwele.

25 Isiliva esavela kulabo abahlala khona ababebaliwe ngesikhathi sokubalwa kwabantu sasilesisindo esingamakhilogramu azinkulungwane ezintathu ezilamakhulu amane, kusiya ngamakhilogramu endawo engcwele –

26 umuntu emunye amagramu amahlanu alengxenye, okuyikuthi, ingxenye yesilinganiso esasisetshenziswa endaweni engcwele, kubo bonke labo ababechaphele kwabasebebaliwe, abaleminyaka engamatshumi amabili loba ukwedlula lapho ubudala, kwaba lamadoda angamakhulu ayisithupha lantathu enkulungwane elamakhulu amahlanu alamatshumi amahlanu esehlangene wonke.

27 Isiliva esiyisisindo esingamakhilogramu azinkulungwane ezintathu ezilamakhulu amane sasetshenziswa ekwenzeni izisekelo zendawo engcwele kanye lekhetheni – izisekelo ezilikhulu zenziwa ngesiliva esingamakhilogramu azinkulungwane ezintathu ezilamakhulu amane, amakhilogramu esiliva angamatshumi amathathu lane abe ngawesisekelo esisodwa. 28 Basebenzisa isiliva esilesisindo esingamakhilogramu angamatshumi amabili ukwenza izingwegwe zezinsika, ukuhuqa izihloko zensika, kanye lokwenza amabhanti ensika.

29 Isilinganiso sethusi lonke lomnikelo wokuzunguzwa lalingamakhilogramu azinkulungwane ezimbili ezilamakhulu amane.

30 Balisebenzisa ukwenza izisekelo zesango leThente lokuHlanganela, I-alithare lethusi, iminxibo yalo yethusi kanye lazo zonke izitsha zalo, 31 izisekelo ezihonqolozele iguma lalezo ezisesangweni kanye lezikhonkwane zethabanikeli lazo zonke ezihonqolozele iguma.